Samandráttir frá 3. umfari

MENN: NSÍ vann óvanliga stóran sigur í grannauppgerðini ímóti B68. NSÍ vann heili 11-0. Hálvleiksstøðan var 4-0. Petur Knudsen fekk hatrikk í dystinum. Klæmint Olsen og Brandur Olsen skoraðu tvær ferðir, og hini málini skoraðu Beinir Nolsøe, Aron Knudsen og Emil Weihe Joensen.

KÍ vann 2-1 á EB/Streymi. Páll Klettskarð og Deni Pavlovic skoraðu fyri heimaliðið. Búi Egilsson skoraði EB/Streyms-málið. Stutt fyri leiklok bleiv Meinhard Debes Geyti hjá EB/Streymi útvístur.

Við 1-0 sigri á TB vann B36 sær fyrstu stigini í ársins landskapping. Mattias Hellisdal skoraði sigursmálið í fyrra hálvleiki.

Føroyameistarin, Víkingurin, hevur enn ikki fingið sín fyrsta sigur til høldar. Í dag spældur teir málleysan javnleik ímóti 07 Vestur.

HB vann greiðan 4-0 sigur á FC Suðuroy. Heimaliðið var á odda 1-0 í hálvleikinum við máli frá Jákupi Thomsen. Í seinna hálvleiki skoraðu Noah Mneney, Emil Grønn Pedersen og Heini F. Sørensen fyri HB, sum enn hevur fult stigatal.