Samandráttir frá 11. umfari

Kvinnur: Spenningurin er stórur í oddanum í Betri deildini. KÍ vann á NSÍ í oddadystinum við Løkin, og nú eru tey bæði feløgini jøvn á fyrsta og øðrum plássi við 27 stigum hvør. NSÍ hevur tó frægari málmun. KÍ var á odda 2-0 í hálvleikinum við málum frá Duritu Hummeland og Tóru Mohr. Í seinna hálvleiki minkaði Heidi Sevdal um munin fyri NSÍ, men tað bleiv ikki til meira enn tað fyri vespurnar, og tí vann KÍ 2-1.

Víkingur vann ein tryggan 6-0 sigur á B36 í Gundadali. Tær ljósabláu eru nummar fýra – trý stig aftanfyri HB.

FC Hoyvík vann fyri fyrstu ferð í ár, tá 07 Vestur var á vitjan í Hoyvík. Dysturin endaði 2-1.

Undir Mýruhjalla vann HB 6-0 á Skála. Dagsins leikari var Lisa Haraldsen, sum skoraði heili fimm mál.