Samandráttir frá 12. umfari

MENN: Víkingur spældi sannførandi í oddadystinum í Klaksvík og við málum frá Olafi Bárðarson og Arnbirni Svensson vunnu teir ljósabláu 2-0 á føroyameistaranum, KÍ.

Heðin Hansen bleiv match-vinnari fyri HB í Runavík. HB sigurin tóktist tryggur, tá teir vóru á odda 2-0. Men NSÍ svaraði tvær ferðir aftur og javnaði til 2-2. Heðin Hansen skoraði sigursmálið fyri HB, tá 91. minuttir vóru spældir.

Í Gundadali hildu B36 og 07 Vestur málveitslu. Verjurnar hjá báðum pørtum vóru í gávuhýri, og tí endaði dysturin við fýra málum í part, 4-4.

Fyri fyrstu ferð í ár eydnaðist tað B68 at fara av vøllinum í landskappingini við einum sigri. Toftamenn vunnu 2-0 á EB/Streymi. Villiam Klein skoraði bæði málini.

Skála legði trý stig afturat, tá teir í dag vunnu 3-2 á ÍF. ÍF helt seg hava javnað til 3-3 í 91. minutti, men málið bleiv kolldømt.