Samandráttir frá 13. umfari

MENN: NSÍ var tvær ferðir á odda móti B36 í Gundadali, men báðar ferðir svaraði B36 aftur. NSÍ og B36 fingu eitt stig hvør fyri javnleikin, har Michal Danian Przybylski og Steffan Løkin skoraðu fyri gestirnar. Málini hjá B36 skoraðu Bergur Poulsen og Pætur Petersen.

KÍ koyrir á við fullari ferð. Hesaferð vunnu teir bláu úr Klaksvík 4-0 á 07 Vestur í Sørvági. Páll Klettskarð (2), Árni Frederiksberg og Mads Boe Mikkelsen skoraðu málini.

Víkingur vann 3-0 á TB við Stórá. Við sigrinum lyfti Víkingur seg upp á fjórða pláss í Betri deildini. Sølvi Vatnhamar, Jørgen Nielsen og Stefan Radosavljevic skoraðu málini.

Hóast FC Suðuroy eitt skifti í seinna hálvleiki var á odda 1-0, eydnaðist tað EB/Streymi at tryggja sær øll trý stigini við 2-1 sigri. Hunter Boaz Bell legði FC Suðuroy á odda, tá ið 70 minuttir vóru farnir. Virgar Jónsson javnaði, tá ið 84 minuttir vóru farnir. Sigursmálið kom í 90. minutti, og tað var sjálvmál. EB/Streymur hevur nú 20 stig, sum er sama stigatal sum Víkingur og B36 hava.

HB, sum møtti B68 í Fuglafirði, fór aftur til Havnar við einum trivaligum 4-1 sigri. HB var á odda 2-1 í hálvleikinum. Emil Pedersen (2), Ási Dam og Dan í Soylu skoraðu fyri HB. Aron Reinert Hansen skoraði fyri B68, tá ið hann í fyrra hálvleiki javnaði til 1-1.