Samandráttir frá 18. umfari

MENN: Grannauppgerðin í Suðuroynni millum TB og FC Suðuroy bleiv nógv mest undirhaldandi og spennandi dysturin í hesum umfarinum. FC Suðuroy vann 3-2, eftir at TB hevði verið á odda 2-0. Øll málini komu uppá ein góðan hálvan tíma í fyrra hálvleiki.

Við 1-0 sigri á 07 Vestur lyfti NSÍ seg upp á annað plássið aftur. Málið, sum Fabian Østigård Ness skoraði, kom longu, tá ið ein góður minuttur var spældur.

KÍ hittaði á summarfestivalinum. Sjey ferðir sóu norðingar bláa liðið hjá sær sparka bóltin í B68-málið, meðan toftamenn einki aftursvar høvdu.

Víkingur liggur nú væl fyri til at fáa fjórða plássið í Betri deildini. Víkingur vann 4-2 á kappingarneytanum úr B36.

HB vann sær øll trý stigini við 2-1 sigri á EB/Streymi. Dystaravgerandi málið hjá HB kom tó ikki fyrr enn í allarsíðstu løtu.